「食得喜」樂齡美食烹飪大賽2025 決賽圓滿結束🎉

CareFood
10月27日
讀畢需時 2 分鐘

第七屆「食得喜」樂齡美食烹飪大賽決賽已於10月18日順利舉行🥳！今次係第一次所有參賽者都係外籍家庭傭工（外傭），我哋亦有幸邀請到菲律賓領事館總領事Romulo Victor M. Israel Jr.先生✨、總領事夫人Catherine Joy P. Israel女士✨及助理勞工專員Nemesia Karen E. Arlan女士✨及印尼領事館資訊與社會文化副領事Zivya Syifa Husnayain女士✨出席今次比賽。今年比賽以「懷念的味道」為題，鼓勵參賽者將吞嚥困難人士中意嘅食物轉化為照護食，令佢哋可以重拾懷念嘅味道。

今年共有7位參賽者入圍決賽，佢哋需要嘗試烹調出一道符合照護食標準指引等級4至等級7EC嘅菜式。而部份僱主都喺整個訓練及比賽過程支持參賽者。每位參賽者嘅菜式都十分吸引，色彩鮮艷，背後亦花費好多心機設計菜式❤️，從營養、調味、擺盤等都經過仔細考量，非常用心😍。設計理念及故事亦相當感人。

今年比賽亦有來自中華廚藝學院(CCI)及國際廚藝學院(ICI)嘅學廚協助比賽進行。學廚以「照護食見習生」嘅身份，同外傭交流煮食心得，一齊烹調、改良菜式，協助佢哋完成賽事💪🏻。我哋期望透過今次比賽，鼓勵新一代廚師認識照護食，提升專業技能，並推動社會共融🥰！

經過星級評判嘅試食評分後，我哋已經分別選出咗「美食」嘉許、「喜悅」嘉許、「聯繫」嘉許及「關愛」嘉許。各個獎項將會於11月22日「樂齡科技博覽暨高峰會」嘅「食得喜樂」齡美食烹飪大賽2025頒獎典禮現場頒發🏆。

同以往一樣，我哋今年亦會開放公眾投票活動！投票會喺10月下旬開始，歡迎大家一齊透過帖文「讚好」功能，選出心目中最喜愛嘅照護食菜式。獲得最多「讚好」👍🏻嘅作品將獲公眾至愛大獎，獎項將一同於11月22日中頒發。

在此再次感謝一眾嘅策略夥伴及贊助、各機構單位、評委嘅鼎力支持，期望人人食得喜、區區有啖好食🥰！

👉如欲了解更多公眾投票及頒獎典禮嘅詳情，記得留意我地網站：https://www.carefood.org.hk/ 及 Facebook最新消息！