第四屆計劃内容
本屆創革者
何智達先生, Godfry
仁愛堂 賽馬會田家炳綜合青少年服務中心
社會工作員 (I)
倪欣彤女士, Umen
浸信會愛羣社會服務處 灣仔綜合兒童及青少年服務中心
青年服務隊長
黃寶女士, Bonnie
香港路德會社會服務處 路德會富欣花園長者中心
中心主任
黎兆雯女士, Catherine
協康會 陳宗漢紀念中心
高級中心經理
.png)
譚民彥先生, Calvin
香港家庭福利會 葵芳服務中心（長者服務）
社會工作員 (II)
本屆接待機構
.png)
最新活動花絮
創革者意念實踐活動：「照顧者充電站」
本屆五位創革者近日利用「意念實踐」基金舉辦跨咗一場跨機構嘅聯合活動 —「照顧者充電站」，以關顧照顧者為主題，旨在通過多元媒介，為照顧者提供放鬆與喘息嘅空間，讓照顧者喺繁忙嘅生活中找到片刻平靜。
展覽中透過文字、照片同錄音等形式，呈現照顧者嘅真實故事同感受，讓參加者體會到照顧者嘅努力同挑戰外，讓更多人關注呢個重要議題。
另外，活動特別邀請青年朋友進行音樂表演，透過演繹不同年代嘅歌曲，讓佢哋喺參與活動同時感受照顧者嘅辛酸，增進彼此理解同支持。同時設有香水調配工作坊，讓參加者能夠憶起「幸福」味道的同時，製造屬於自己的味道，在往後日子陪伴著大家。
創革者仲好有心思地為入場朋友準備咗空靈鼓作為紀念品，希望大家返到屋企都能夠透過音樂療癒屋企人同埋自己。
期望展覽能夠成為大眾人士觸動心靈的契機、喚起對照顧者嘅關懷與共鳴。
「照顧者充電站」主辦機構：
總結日暨嘉許禮
第四屆「創革者」計劃總結日暨嘉許禮日前順利舉行，匯聚社福同工、跨界別夥伴及創革者，共同見證本屆計劃的成果與成長！活動以 「人本」、「初心」、「共創」、「設計思維」 為核心，透過多元環節展現創革者的轉變與協作力量。
活動以社聯業務總監譚穎茜博士的開幕分享揭開序幕，她以《社福界的内部創革》為題，探討社福機構如何透過創新思維推動變革以及引用日本企業家—稻盛和夫的例子強調「初心」的核心價值，激勵在場同工反思與突破。
大會首播「計劃精華影片」，帶領全場回顧創革者培訓、共創項目的點滴與成果，從設計思維工作坊到實戰協作，一幕幕畫面見證了創革者的努力與團隊間的默契。
緊接其後，五位創革者輪流以「年輪卡」分享他們的個人歷程與計劃心得，不僅展現了他們的成長與蛻變，更讓觀眾感受到社福工作的溫度與使命。
來自非常香港的總經理--陳沛賢女士以《跨界別共創—經驗分享》為題，分享如何打破界別藩籬，透過協作創造更大社會效益，為參與者帶來嶄新啟發。
在此再次恭喜本屆五位創革者完成計劃。計劃完結就好似將一粒即將發芽嘅種子放入土壤，期望各位將計劃所得帶返機構，甚至延伸到不同界別，種出茂盛嘅花朵、延續創革魂！
創革者訓練營 III + 加油站 III
日前舉辦嘅創革者訓練營III帶領創革者同一班參加者去到土瓜灣 #樂在製造 嘅工作室喺上午加油站環節聆聽 #賽馬會社會創新設計院 高級經理、#樂在製造 前負責人 #Paddy #吳伯風先生 介紹佢嘅自身經歷，以一個斜槓族嘅角度分享佢嘅探索之路，又分享樂在製造多年嚟同唔同單位嘅共創點樣喺現實生活中實踐出嚟。
Paddy講述自造者與倡議者嘅經驗，鼓勵參加者勇於嘗試同埋，亦透過手推車改造計劃帶出「先行先試」嘅概念，鼓勵大家實踐「設計思維」中「Trial & Error」的概念；同時提醒社會工作者可以多從服務使用者嘅角度出發、甚至為咗完善計劃而重新詮釋「PLAY」一詞，做到真正同使用者同行共創嘅概念，而唔係單純讓使用者成為計劃參與者之一簡單。佢仲都透過「九巴短片製作職學計劃」、「大坑時空藝文自助遊」等計劃帶出社區協作嘅「共創」如何發生。
透過利用A-to-Z都市紋理地圖，提醒參加者能夠多留意自己熟悉嘅社區入面唔同嘅空間結構，透過觀察地區城市規劃，加深了解該區嘅歷史同埋故事。最後，參加者再落區參觀，真實感受土瓜灣的城市脈絡，到訪「土瓜灣五星戰隊」小店，鼓勵參加者了解社區嘅特色，與社區同行。
創革者訓練營 II + 加油站II
訓練營II已於日前順利完成。我哋去到#YWCA天拉吧 #天水圍故事館，喺上午加油站環節聆聽館長— #小宇 嘅分享，了解佢對於營造社區同埋用藝術說故事嘅經驗。
活動開初透過「膠紙會說話」形式讓創革者同一眾參加者利用唔同顏色同長度嘅膠紙，就住唔同主題喺檯面拼貼出唔同嘅圖案，以創意熱身，讓大家透過親身體驗嘅形式展開序幕。
接住落嚟小宇親身分享佢喺天水圍進行社區工作嘅不同想法同經驗，仲同同事帶領一眾參加者去到天水圍公園實地參觀，介紹天拉吧曾經喺天水圍社區舉辦過嘅活動。無論係以輕鐵為主題嘅「705.5循環線站牌」嘅叮叮樂器、公園善用閒置電話亭作展覽或者係介紹植物嘅花牌，都以真實例子展示點樣善用現有嘅空間同設施，並利用簡單物資配合創意連結社區同街坊。
走訪公園之後，小宇更鼓勵一眾參加者進行「公園狂想曲」環節，利用膠片同畫筆發揮天馬行空嘅創意，任意想像公園內可以進行嘅活動，然後再同其他諗咗唔同類型活動嘅參加者合併同埋交換大家嘅想法，一齊帶住膠片遊走公園內唔同嘅角落「打卡」，將心中虛構嘅創意透過相片形式加添到實境當中。
小宇喺活動尾聲嘅分享，畀大家再次思考喺社福界工作時遇到嘅掙扎及取捨，希望能夠為大家助力同埋重拾大家對於工作嘅信念，令一眾參加者都好有共鳴。
希望參加者能夠從今次活動得到啟發，多利用同埋留意身邊現有嘅地方同資源，再大膽進行天馬行空嘅想像，最後再結合其他人嘅諗法，一齊共創、孕育無限嘅新可能。
除咗上午嘅加油站環節外，下午亦有培訓夥伴 #仁愛堂青年夢工場 教授設計思維嘅工具，讓創革者透過工具搵出服務對象真正需要、定義問題，並就住定義嘅問題爆橋，構思介入或解決方法。五位創革者坐埋一齊，分享早前透過訪談了解服務對象嘅笑點同痛點，並就住呢啲發現定義目標、幫助大家觀點同步同討論解決方法。佢哋實踐共創精神，彼此配搭下聯手打造更多元嘅內容。
過程當中，創革者透過「任性諗橋」放下一切既有框架、天馬行空地提出諗法。佢哋都創意十足，諗出好多新奇嘅點子。雖然呢個步驟諗出嘅橋未必完全適合實行，但喺當中或許會有意想不到嘅效果。正如上午分享嘉賓——小宇帶領嘅活動「公園狂想曲」：當大家任意想像公園入面可以進行嘅活動，同工們互相jam橋時就會出現好多意想不到嘅點子，發掘出新嘅可能性！
當然，同工們推行計劃時往往都需要有好多實質考量，搵出既有創意又能夠實踐嘅橋。相信設計思維呢套工具喺機構日常工作中，可以幫助大家更有效解決服務對象嘅需要，同時考慮必要性、可行性、成效、創新度等面向，提升服務果效。
經過整個下午嘅設計思維腦震蕩，創革者嘅腦海入面應該藏住好多意念。究竟呢條好橋係啲咩？唔知道佢哋會唔會利用計劃嘅意念實踐基金實踐呢？大家一齊拭目以待！
創革者訓練營 I
日前正式舉行咗第四屆「社會福利機構創革者培育計劃」嘅第一個創革者訓練營，感謝大家嘅參與希望各位社福界嘅同工能夠先好好照顧自己，然後再走入社區堅守工作崗位、照顧其他人。
計劃團隊喺活動嘅第一部分（加油站環節）邀請到 靜觀減壓課程 (MBSR)導師 - MaggieLin 同大家透過靜觀方式，讓大家好好觀察、感受自己嘅呼吸同埋情緒亦都提醒同工們喺日常生活中都可以用唔同嘅方法去放鬆，好好聆聽自己身體嘅需要，先會有動力繼續去照顧別人。
除咗照顧自己嘅身心需要之外，計劃團隊亦都邀請咗明愛基層組織發展計劃 嘅同事帶領參加者到訪即將進行重建工作嘅長沙灣兼善里，分享以往凝聚社區網絡嘅經驗；更加邀請到街坊進行分享，講述面臨重建嘅時候，同工點樣協助街坊們面對生活嘅困難同埋如何將承載住好多溫馨故事嘅兼善里嘅情懷傳承落去畀更加多人認識。分享時當然都不乏街坊們同同工相處時嘅窩心時刻，令在場參加者都感受到喺社區營造工作時縱使面對困難，但係有賴社區入面唔同人士嘅結連而引發起好多充滿人情味嘅回憶。
除咗進行靜觀察練習同參觀兼善里之外，活動場地 #渴喝 店主亦都帶領參加者參觀，佢哋租借一整棟唐樓，以旅遊為主題，開設咖啡廳、書店，並時常借出空間舉辦各項社區活動。店主自己亦樂於同人分享佢哋旅遊嘅經歷、對國際關係嘅理解，書店入面亦都售賣各種同世界各地文化、旅遊有關嘅書籍。透過佢哋嘅分享，大家都開闊咗視野，見到空間嘅可能性同人嘅多變性。
活動之間，計劃團隊安排同創革者及接待機構代表共晉午餐，當中有更加多交流嘅機會，讓彼此喺工作以外又對大家認識更加多。
最後環節亦有培訓夥伴仁愛堂青年夢工場 教授設計思維嘅工具，讓大家從服務對象角度出發，逐步搵到對象面對緊嘅痛點，分析問題嘅因果，以至構思嘅創新點子能夠真正對應並解決問題。希望創革者同接待機構喺影子實習嘅過程，甚至工作時，都能夠受到呢套思維模式嘅啓發，構想更多既對社會有效益又能夠切實解決問題嘅點子。
創革啟航日暨實習配對日
第四屆「社會福利機構創革者培育計劃」已正式開始，早前已舉辦會面日，亦由評審團隊選出五位社福同工成為今屆嘅創革者，更於星期三（3月12日）舉辦「創革啟航日暨實習配對」。
是次「創革啟航日暨實習配對」係今屆創革者同接待機構首次見面，大家透過熱身遊戲互相認識，並透過承諾樹葉記低自己對計劃嘅承諾。希望日後大家喺活動中見到「承諾之樹」，可以提醒自己當初許下嘅承諾。
喺配對環節中，創革者同接待機構分組交流，互相了解及評分以完成配對。每位創革者及接待機構同工都十分投入，並從活動中認識到新嘅人脈，達到織網嘅效果。
期待各位創革者及接待機構於日後可以擦出新火花，透過計劃互相喺創革路上並肩前行、向未來邁進！
